Eztabaidatzeko eta erabakitzeko lekua Gerediagako baseliza, San Salbadorri eskainia, ez da ohiko baseliza, baizik eta zin egitekoa. Bertan batzartzen ziren Durangaldeko 12 merindadetako ordezkariak, baseliza parean ikus daitezkeen pilastretan eserita.

​

Batzar haiek Erdi Aroan egiten ziren, Durangaldeak bizitza autonomo aberatsa zuenean, haiek baitziren eguneroko auziak ebazten zituztenak. Badakizu non, ezta? Horixe baietz: ordezkariak baseliza pareko zelaian batzartzen ziren, eta zirkuluaren erdian dagoen pilastran ematen zuten botoa.

​

Bizkaiko juntetxe guztietan bezala, Gerediagan ere aurki daiteke haritz bat, ohorearen eta indarraren irudi gisa. Tradizioari jarraiki, haritz baten itzalpean hartu behar dira erabaki garrantzitsuak.

​

Egun, Gerediaga Bizkaiko Batzar Nagusien egoitzetako bat da, Gernikako eta Abellanedako juntetxeekin batera, baita Bilboko administrazio-egoitzarekin ere.

​

Multzoan bertan aurki daiteke, baselizaren alboan, gurutze errenazentista-gotikoa. Durangaldeko hainbat lekutan aurki daitezke gurutzeak, hala nola, Durangoko Gurutzediagan edota Elorrion, non gurutze guztiak ezagutzeko ibilbidea egin daitekeen.

​

Gerediagako azken elementu gisa, baina garrantzi berarekin, paisaia eta ikuspegi miragarriak aipatu behar dira. Baselizatik ikusiko dituzu Urkiolako mendilerroa eta inguruko mendiak: Anboto, Alluitz, Untzollatx... Horietako batzuk ezagutuko dituzu, ziurrenik, baina bestela ez kezkatu: interpretazio-panel baten bitartez ipiniko dizkiezu izenak.