Aiarako Jauna izan zen, Erdi Aroan, Arabako pertsonaia distiratsu eta ospetsuena. Bada, bere etxeko ateak zabalduko dizkigu Kexaan, Euskal Herrian hain garrantzitsua izandako leinu horren altxorrik handienak ezagutzeko.

​

Gaztelako Erresumako kantzilerra ez ezik (egungo lehen ministroaren antzeko kargua), Petri Lopez Aiaratarra poeta, lau erregeren kronikaria, gerlaria, errege-aholkularia eta Pizkundearen defendatzailea ere izan zen. Alegia, XIV. mendeko ikur handienetakoa. 

​

ONGI ETORRI AIARAKO JAUNAREN ETXERA

​

Elkar aurkeztuta, bada garaia Aiarako Monumentu Multzora sartzeko. Jauregi gotortua, moja domingotarren komentua, San Joan Bataiatzailearen eliza eta Adatsaren Ama Birjinaren dorre-kapera bereiz daitezke bertan, muino berde leunez inguratuta. Horiek guztiek koadro perfektua osatzen dute.

​

Dorre-kaperaren behealdea bisitatzea ezinbestekoa da. Bertan aurkituko dituzu Aiaratarren hilobiak, alabastroan zizelkatuta. Euskal Herriko egurrezko hilobi bakarrak dira, izan ere, garai hartan harrizkoak egin ohi ziren. Errepara iezaiozu oheburu osoa hartzen duen erretaula gotikoari: irudi koloretsuek txunditu egingo zaituzte.

​

Erlijio-Arte Museoa bisitatzea gomendatzen dizugu, Aiaratarren altxor eta oroigarriak ikusteko. Horiek eta Monumentu Multzoak berak lagunduko dizute halako pertsonaiaren bizimodua irudikatzen.

​

INGURUNE EZIN EDERRAGOA

​

Bisitaren ondoren, egin ibilbidetxoa Kexaa ingurutik: paraje isil eta lasaia da, eta baretasun hori Aiaratarrak bisitatzera etortzen ziren soldadu eta jauntxoen zaldien zaratak baino ez zuen urratzen.