1/5
Aniztasunez beteriko paradisua

URKIOLAKO PARKE NATURALA

ESKALADA, NATURA, MITOLOGIA, ETA ASKOZ GEHIAGO!

Parke honetan daude Aramotz mendilerroko lurralderik garaienak. Kokapen geografikoagatik, naturazale ororentzako leku ideala da, eta Anboto eta Mariren haitzuloa dira edozein mendizalek nahitaez bisitatu beharrekoak. 

 

Kuriositatea asetzeko, jakin Urkiola urki zuhaitz-izenetik datorrela, inguruan zuhaitz-mota hori oso ugaria baita.

 

Eskalada gustuko baduzu, hauxe da zure parke naturala. Astxiki, Urrestei edo Alluitzeko horma malkartsuak ezin hobeak dira zu bezalakoentzat. Euskal Herriko eskalatzaile askok aukeratu izan dituzte kirol hori egiteko. Gaur egun, Euskal Herriko eskalada-eskola garrantzitsuenetako bat Atxarten dago, eskalatzeko 400 biderekin baino gehiagorekin.

MITOAK ETA KONDAIRAK

Urkiola misterioz betetako baselizaz eta haitzuloz zipriztinduta dago, zeinak, aldi berean, mila eta bat kondairaren iturburu izan diren. Mari da, dudarik gabe, Urkiolaren inguruko kondaira ezagunenetako baten protagonista. Anbotoko dama izenez ere ezaguna da, euskal mitologiaren arabera jainko gorena, baita ekaitzen eragilea ere, eta Euskal Herriko haitzuloak ditu bizileku. Izan ere, 7 urtean behin aldatzen omen du bizitokia, eta, besteak beste, Aizkorri-Aratzen ere ikusi izan dute. Berarengan sinesten dutenei laguntzen ei die, eta, dirudienez, orakuluarena ere egiten du, aholkurik behar bazenu... Uste duzu zuri ere lagunduko dizula?

 

Mariren kondairarekin batera, Urkiolako San Antonio Abad eta Paduako San Antonioren santutegia oso ezaguna da, Urkiolako santutegia izenez ere ezagun dena. Santutegi parean, harri oso berezi bat aurki daiteke: kondairaren arabera, harriaren inguruan 7 bira egiten dituenak maitasuna aurkituko du. Ausartuko zara probatzen?

 

Atxarteko haitzartean ere bada kondairarik. Diotenez, antzina, euskal mitologiako Basajaun erraldoiek belaun bat ipintzen zuten Untzillatx gainean, eta beste bat Astxiki gainean, haitzartean behera jaisten den errekatik ura edaten zutenean.

NOLA IRITSI URKIOLARA

Parkera iristeko biderik errazena Durango eta Gasteiz arteko BI-623 errepidea da, parke osoa zeharkatzen baitu iparraldetik hegoaldera.

INFORMAZIO GEHIAGO

TOKI ALAI - URKIOLA PARKE NATURALEKO INTERPRETAZIO ZENTRUA

Urkiolako mendatea, z/g 48211

Abadiño, Urkiola (Bizkaia)
T. 94 681 41 55


www.turismodurango.net

IBILBIDEAK