Pozalagua Haitzuloko aparkalekutik abiatuko gara, aparkalekuaren amaieran ezkerretara seinaleztaturiko bidexka hartuta. Hasieran, haitz artean igoko gara, eta gero lurrezko bide batean gora, belar artean.

​

Hasi eta 150 m-ra, metalezko atea gurutzatu eta IMra joko dugu, Valseca muinorantz. Horra iritsi eta irekita dagoen hesia gurutzatuta, geziak dituen gurutze bat topatuko dugu. Bideak ezkerretara garamatza (H norabidean). GR-123ren marka zuri-gorriei jarraiki, harri eta belar arteko bidezidorrean aurrera egingo dugu. Tarteka nahasi samarra da, eta badu bidegurutzerik, baina guk beti jo behar dugu eskuinetara gora egiteko.

​

Muinotik 500 m-ra edo, eskuinetara egingo dugu, IM norabidean, eta, elorri zuri baten ondotik igarotakoan, HM norabidea hartuko dugu, sakonune karstikoa gurutzatzeko eta Miron behatokira heltzeko.